[මා තුළ ය ඔබෙ හද (රැගෙන යමි] – ඊ. ඊ. කමිංස්

මා තුළ ය ඔබෙ හද (රැගෙන යමි

එය ම’හද තුළ මම) එය අසළම යි මම (කොහෙ

ගියත් මම, මා එක්කමයි මගෙ සොඳුර; කුමක් කළත් මම

ඔබත් කරනවා ම යි එය, මගෙ සොඳුර)

                                                     නැත බයක් මගෙ

ඉරණමට (ඔබය මගෙ ඉරණම, මා ප්‍රියාදරියේ) ලෝකයක්

අවැසි නැත මට (සුන්දර ඔබ ය මගෙ මුළු ලොව ම, මගෙ එක ම ලොව)

කුමක් කියැවුණ ද සඳ මඟින්, එය කියැවෙන්නෙ ඔබ සඳහා ම ය

දිනිඳු සැමදා ගයන ගීයෙන් ගැයෙන්නෙත් ඔබ ගැන ම පමණ ය.

මෙය ය රහස, කිසිවෙකුත් නොදන්න

(මෙය ය ආකාස ගව්වේ සීමා ඉක්මවා යන

ජීවිතය නම් රුකට අයිති මුලෙත් මුල, අංකුරයෙත් අංකුරය; ආත්මයක්

පතන බලාපොරොත්තුවේ තරම, මනැසේ සීමා ඉක්මවා යන්නට වෙන)

මෙය යි තරු ඈත් කරවන මහා පුදුමය

මා තුළ ය ඔබෙ හද (රැගෙන යමි එය ම’හද තුළ මම)

සිංහල පරිවර්තනය: කාව්‍ය තත්සර